Конституциялык сотунун Төрагасы Э.Ж.Осконбаев Жогорку Кеңештин депутаттарын шайлоого мониторинг жүргүзүү үчүн Борбордук шайлоо комиссиясы тарабынан аккредитацияланган КМШ Парламенттер аралык ассамблеясынын эл аралык байкоочулары менен жолугушту
Бүгүн, 2025-жылдын 28-ноябрында Кыргыз Республикасынын Конституциялык сотунун Төрагасы Э.Ж.Осконбаев Жогорку Кеңештин депутаттарын шайлоого мониторинг жүргүзүү үчүн Борбордук шайлоо комиссиясы тарабынан аккредитацияланган КМШ Парламенттер аралык ассамблеясынын эл аралык байкоочулары менен жолугушту. Миссиянын курамына сенаторлор, Көз карандысыз Мамлекеттер Шериктештигинин мамлекеттеринин парламенттеринин депутаттары, КМШ Парламенттер аралык ассамблеясынын өкүлдөрү жана Демократиянын өнүгүшүн мониторингдөө боюнча эл аралык институттун эксперттери кирген. Жалпысынан 70тен ашык байкоочу аккредитацияланган.
Топтун жетекчиси М. Ватаназода миссиянын негизги максаты – шайлоо процессине кийлигишпөө принциптерин так сактоо менен добуш берүүнүн жүрүшүн объективдүү байкоо жүргүзүү экендигин баса белгиледи. Ал белгилегендей, ар кандай шайлоо – бул мамлекет үчүн, анын институттары жана саясий маданияты үчүн олуттуу сынак, ал эми байкоочулардын милдети – калыстыкты жана бейтараптуулукту сактап, фактыларды каттоо.
Жолугушуунун жүрүшүндө талапкерлердин жаш курагы, күрөө суммасынын өлчөмү, ошондой эле гендердик квотаны сактоо маселелери козголду. Тараптар тиешелүү ченемдерди колдонуунун өзгөчөлүктөрүн жана алардын шайлоодо атаандаштыкты жана тең катышууну камсыз кылуудагы ролун талкуулашты.
Өз кезегинде Конституциялык соттун Төрагасы эл аралык байкоочулардын катышуусунун маанилүүлүгүн жана алардын шайлоо процедураларынын ачыктыгын жана ишенимдүүлүгүн жогорулатууга кошкон салымын белгиледи. Ал 2011-жылдан бери Конституциялык сот шайлоо укугу маселелери боюнча 11 ишти карагандыгын, бирок иштеп жаткан судья катары КСнын кароосунун предмети болушу мүмкүн болгон маселелер боюнча позициясын билдире албасын баса белгиледи.
Э. Ж. Осконбаев шайлоонун негизги натыйжасы элдин татыктуу өкүлдөрүн шайлоо, ал эми добуш берүүнүн жыйынтыгы коомчулуктун ишенимине ээ болууга тийиш деген ишеничин билдирди. “Биз шайлоо таза жана ачык өтөт деп ишенебиз”, – деп белгиледи ал.
Жолугушуу ачык кызматташууга жана маалымат алмашууга даяр экендигин ырастоо менен аяктады. Тараптар биргелешкен иш Кыргыз Республикасында укуктук институттарды өнүктүрүүгө жана демократиялык процесстерди бекемдөөгө салым кошот деген ишенимди билдиришти.
