Конституциялык сот Ош шаардык сотунун судьясынын өтүнүчүн өндүрүшкө кабыл алды
Кыргыз Республикасынын Конституциялык соту Ош шаардык сотунун судьясы Асанова Ч.К.нын Кыргыз Республикасынын Кылмыш-жаза процессуалдык кодексинин 528-беренесинин 4-бөлүгүнүн конституциялуулугун текшерүү жөнүндө өтүнүчүн өндүрүшкө кабыл алды.
Талашылып жаткан ченем эл аралык издөөдө жүргөн адамды убактылуу камакта кармоодон баш тартуу жөнүндө токтом чыгарылган учурда, тергөө судьясынын прокурордун өтүнүчү боюнча токтомду кайра кароо жана ишти апелляциялык тартипте кароо мезгилине аны камакта кармоо жөнүндө бир эле учурда чечим кабыл алуусун карайт.
Кайрылууга судьянын талашылып жаткан ченем адамдын эркиндигине жана жеке кол тийбестигине болгон конституциялык кепилдиктерге, адам укуктарын чектөөнүн зарылчылык жана өлчөмдөштүк принциптерине, ошондой эле Кыргыз Республикасынын эл аралык келишимдеринин талаптарына шайкеш келбеши мүмкүн деген пикири негиз болгон.