Бангкок шаарында Азия-Тынч океан регионунун аял-судьяларынын биринчи регионалдык жолугушуусу өтүүдө
2026-жылдын 16–18-ноябрында Таиланддын Бангкок шаарында Азия-Тынч океан регионунун аял-судьяларынын (APWJN) биринчи регионалдык жолугушуусу өтүүдө. Бул иш-чараны Бириккен Улуттар Уюмунун Өнүктүрүү программасы (ПРООН) Азия өнүктүрүү банкы (АӨБ) менен биргеликте уюштурган.
Жолугушууга Түштүк, Түштүк-Чыгыш, Чыгыш Азия, Борбордук Азия жана Тынч океан регионунун өлкөлөрүнөн 30га жакын аял-судья катышууда. Анын негизги максаты – кесиптик кызматташтыкты чыңдоо, соттук тажрыйба менен алмашуу жана сот системаларындагы аялдардын лидерлик дараметин өнүктүрүү болуп саналат.
Кыргыз Республикасынан бул жолугушууга Конституциялык соттун судьясы Чинара Айдарбекова катышууда. Ал APWJNдин Консультативдик комитетине Борбордук Азиядан чакырылган.
Чинара Айдарбекова Пакистандын Жогорку сотунун судьясы Айеша Малик менен биргеликте «Сот системаларындагы лидерлик» аттуу тематикалык талкуунун тең модератору болду. Талкуунун жүрүшүндө судьяларды адилеттүү тандоо жана кызматтык жогорулоо, ошондой эле жарандардын сот системасына болгон ишенимин арттырууга аял-судьялардын кошкон салымы талкууланды.
Үч күндүн ичинде катышуучулар, ошондой эле санариптештирүү менен жасалма интеллекттин сот адилеттигине тийгизген таасирин, сот этикасынын стандарттарын, сотторго карата коомдук ишенимди жогорулатуу жолдорун, институционалдык реформаларды жана судьялардын кесиптик туруктуулугун талкуулашты.
Жолугушуунун жыйынтыгы боюнча Азия-Тынч океан регионунун өлкөлөрүнүн судьяларынын өз ара аракеттенүүсүнүн негизги багыттары аныкталды. Алардын катарына насаатчылыкты өнүктүрүү, өз ара окутуу жана аялдарга, балдарга жана калктын башка аярлуу катмарына тиешелүү иштерди кароодо алдыңкы тажрыйбаларды үзгүлтүксүз алмашуу кирет.







