Конституциялык соттун судьяларына жана аппараттын кызматкерлерине жаңы судья тааныштырылды
2026-жылдын 19-ноябрында Кыргыз Республикасынын Конституциялык сотунун судьяларына жана анын аппаратынын кызматкерлерине Конституциялык соттун судьялыгына шайланган Алмазбек Тавалдыевич Молдобаев тааныштырылды. Аны Кыргыз Республикасынын Президентинин Администрациясынын Президенттин жана Министрлер Кабинетинин укуктук камсыздоо башкармалыгынын начальниги Мурат Каниметович Укушов жана Кыргыз Республикасынын Президентинин Администрациясынын соттор жана прокуратура органдары менен өз ара аракеттенүү бөлүмүнүн башчысы Нурлан Арзыматович Сулайманкулов тааныштырды.
Тааныштыруу учурунда Алмазбек Молдобаевдин кесиптик тажрыйбасы, юридикалык квалификациясы жана Кыргыз Республикасынын укуктук системасын өнүктүрүүгө кошкон салымы белгиленди. Ага Конституциялык соттун судьясынын ыйгарым укуктарын ийгиликтүү аткаруу каалоолору айтылды.
2026-жылдын 18-ноябрында Кыргыз Республикасынын Жогорку Кеңеши «А.Т. Молдобаевди Кыргыз Республикасынын Конституциялык сотунун судьясы кызмат ордуна шайлоо жөнүндө» токтом кабыл алган.
Судьялык кызматка шайланганга чейин Алмазбек Молдобаев Кыргыз Республикасынын Президентинин жана Министрлер Кабинетинин Конституциялык соттогу туруктуу өкүлү болгон. Андан мурдараак ал Бишкек шаарынын Биринчи май райондук сотунун судьясы болуп иштеген, ошондой эле Кыргыз Республикасынын Президентинин Администрациясында жана Жогорку Кеңешинде ар кандай кызматтарды аркалаган. 2019-жылдан 2023-жылга чейин Жогорку Кеңештин Укук тартиби, кылмыштуулук менен күрөшүү жана коррупцияга каршы аракеттенүү боюнча комитетинин бөлүмүн жетектеген.
Алмазбек Тавалдыевич Жусуп Баласагын атындагы Кыргыз улуттук университетинин юридикалык факультетин, Россия Федерациясынын Аскердик-дипломатиялык академиясын жана Коргоо министрлигинин Аскердик университетинин адъюнктурасын аяктаган. Юридика илимдеринин кандидаты, окумуштуулук даражасы бар. “Мамлекеттик жарандык кызматтын 1-класстагы кеңешчиси” класстык ченине, ошондой эле юстициянын полковниги аскердик наамына ээ.







