Бишкекте конституциялык сот өндүрүшү боюнча II республикалык «Moot Court – 2026» сынагы өттү
2026-жылдын 21-ноябрында «Ала-Тоо» эл аралык университетинин базасында Кыргыз Республикасынын Конституциялык соту «Civics» коомдук фонду жана «Ала-Тоо» эл аралык университети менен биргеликте конституциялык сот өндүрүшү боюнча «Соттук процесстердин моделдештирилген оюндары» аталышындагы II республикалык «Moot Court – 2026» сынагын өткөрдү.
Сынакка өлкөнүн сегиз жогорку окуу жайынан сегиз студенттик команда катышты. Моделдештирилген соттук отурумдардын жүрүшүндө катышуучулар конституциялык укук жаатындагы билимдерин, укуктук талдоо жүргүзүү, жүйөлүү далилдерди келтирүү жана эл алдында сүйлөө жөндөмдөрүн, ошондой эле чыныгы сот процессине жакын шарттарда өздөрүнүн укуктук позициясын коргой билүү жөндөмүн көрсөтүштү.
Командалардын ишине 12 эксперттен турган калыстар тобу баа берди. Анын курамына Кыргыз Республикасынын Конституциялык сотунун судьялары, Кыргыз Республикасынын Жогорку Кеңешинин, Жогорку сотунун, нотариат коомчулугунун, Юстиция министрлигинин, Илим, жогорку билим берүү жана инновациялар министрлигинин, Кыргыз Республикасынын Жогорку сотуна караштуу Сот адилеттигинин жогорку мектебинин өкүлдөрү, ошондой эле башка мамлекеттик органдардын жана юридикалык коомчулуктун өкүлдөрү кирди.
«Moot Court» — юридикалык теория менен практиканы айкалыштырган аянтча. Бул жерде студенттер соттук жарыш сөздөргө катышып, укуктук жагдайларды ар тараптуу талдоого, жүйөлүү аргументтерди келтирүүгө жана өз позициясын ишенимдүү коргоого үйрөнүшөт.
Сынактын негизги максаты — жаштар арасында конституциялык баалуулуктарды жайылтуу, конституциялык сот өндүрүшүнө болгон кызыгууну арттыруу жана келечектеги юристтердин практикалык көндүмдөрүн өнүктүрүү. Моделдештирилген соттук процесстерге катышуу студенттерге конституциялык ченемдердин укуктук талаш-тартыштарды чечүүдө кандайча колдонуларын түшүнүүгө, өз укуктук позициясын негиздөөгө жана кесиптик талкуу жүргүзүү тажрыйбасын топтоого мүмкүндүк берет. Мындай тажрыйба конституциялык укуктун ченемдерин иш жүзүндө колдоно билген, адамдын укуктарын жана эркиндиктерин коргоо маселелеринде терең түшүнүккө ээ квалификациялуу юристтерди даярдоодо маанилүү роль ойнойт.
Сынактын жыйынтыгы боюнча калыстар тобу жеңүүчүлөрдү аныктады:
I орун — Кыргыз-Россия Славян университети (КРСУ).
II орун — Кыргыз Республикасынын Башкы прокуратурасына караштуу Юридикалык академия.
III орун — Кыргызстандын Эл аралык университети (МУК).
IV орун — Ош мамлекеттик университети (ОшМУ).
Мындан тышкары, атайын номинациялар боюнча төмөнкү жеңүүчүлөр аныкталды:
«Арыз ээсинин атынан чыккан мыкты оратор» — Шакарбеков Акжол, Кыргыз Республикасынын Башкы прокуратурасына караштуу Юридикалык академия.
«Жоопкер тараптын атынан чыккан мыкты оратор» — Эркинбеков Абузар, Кыргызстандын Эл аралык университети (МУК).
«Мыкты өтүнүч кат» — Кыргыз Республикасынын Ички иштер министрлигинин академиясынын командасы.
«Мыкты пикир» — «Ала-Тоо» эл аралык университетинин командасы.
Сынак студенттерге өз билимдерин жана жөндөмдөрүн көрсөтүүгө, эксперттердин кесиптик баасын алууга, тажрыйба алмашууга жана келечектеги юридикалык ишмердүүлүгүнө зарыл болгон практикалык көндүмдөрдү өркүндөтүүгө мүмкүнчүлүк түздү.







