Конституциялык палатанын судьяларына жана анын аппарат кызматкерлерине Кыргыз Республикасында жүргүзүлүп жаткан сот реформасы алкагында кабыл алынган жаңы кодекстер тууралуу маалымат берилди
Бүгүн Конституциялык палатанын судьялары жана анын аппарат кызматкерлери Кыргыз Республикасында жүргүзүлүп жаткан сот реформасы алкагында жаңы мыйзамдардын презентациясына катышып келишти.
Жаңы Жазык, Жазык-процесстик, Жазык-аткаруучулук, Жарандык-процесстик, Административдик-процесстик кодекстерди, жоруктар жана бузуулар жөнүндө кодексти иштеп чыгууга катышкан эксперттик жумушчу топтордун жетекчилери жана мүчөлөрү иш-чаранын катышуучуларына көрсөтүлгөн укук тармактарында мыйзамдарды реформалоонун концептуалдык негиздери, концепциялары жана кабыл алынган кодекстердин жаңылыктары тууралуу айтып беришти.
Иштеп чыккандардын айтымына караганда өзөктүү өзгөртүүлөр болуп төмөнкүлөр саналат:
Жазык жаатында укук бузууларды бөлүштүрүү (кылмыш, жорук, бузуу);
Текшерүү институтун түзүү – шарттуу жазалоонун жаңы түрү, соттолгон адам мындайда тиешелүү органдардын көзөмөлүнө өткөрүлүп берилет. Бул шарттуу соттолгондорду тиешелүү деңгээлде көзөмөлдөөгө жана контролдоого жол берет;
Тергөө тараптары ортосунда кызматташуу жөнүндө макулдашууларды түзүү мүмкүнчүлүгү; күнөөнү таануу жөнүндө; тараптардын жарашуусу жөнүндө;
Сотко чейинки өндүрүш башталган учурдан тартып ишке кирише турган тергөөчү судья деген жаңы процесстик фигуранын киргизилиши кылмыш жөнүндө арыз Бирдиктүү реестрде катталган учурдан тарта башталат;
Жазык жоопкерчилигине тартыла турган адамдын укуктарын бекитүү, аларды коргоо үчүн мүмкүнчүлүктөрдү кеңейтүү, адвокаттарга кеңири укуктарды ыйгаруу;
Мыйзамдарды гумандаштыруу – криминалдан арылтуу жана Жоруктар жөнүндө кодекске өзүнчө бөлүнүп чыгарылган бир катар жазык курамдары үчүн жазанын түрлөрүн алмаштыруу. Кийинкиси коомдук олуттуу коркунуч келтирбеген жазык-укуктук жосундар үчүн жазаларды киргизет;
Камакта кармоонун мөөнөттөрүн азайтуу;
Судьялардын көз карандысыздыгы менен бирге жоопкерчилигин бекитүү, соттук чечимдерди аткаруунун ишчил механизмдерин иштеп чыгуу;
Кылмыш жасоо үчүн жазанын кайтарылбастыгын камсыздоо үчүн Жазык кодексинен мунапыс берүүнү жокко чыгаруу. Мунапыс өзгөчө учурларда өзүнчө мыйзам долбоорун кабыл алуу жолу менен берилет.
Иш-чараны «Сорос-Кыргызстан» Фонду Кыргыз Республикасынын Жогорку сотунун Конституциялык палатасы бирге уюштурган.
Эскерте кетсек, 2017-жылдын 1-июлунан тарта Кыргыз Республикасынын Жарандык процесстик кодекси жанга Административдик-процесстик кодекси ишке кирет. 2019-жылдын 1-январынан тарта Жазык кодекси, Жоруктар жөнүндө кодекс, Бузуулар жөнүндө кодекс, Жазык-процесстик кодекс, Жазык-аткаруучулук кодекс күчүнө кирет, ошол учурдан тарта колдонуудагы Кыргыз Республикасынын Жазык, Жазык-процесстик, Жазык-аткаруучулук кодекстери жана Администртивдик жоопкерчилик жөнүндө кодекстер күчүн жоготот.